問題：
讀者何先生問，暴雨、颳風、水浸、山泥傾瀉等情況下行車而致有損失，保險是否有得賠償呢？如果本身是職業司機，天氣惡劣仍非開工不可又如何呢？

答案：
汽車全保保單內列明車主有責任採取安全措施確保在安全情況下行車，所以明知街道上有危險但仍然要駛架車去，就係違反合約，保險公司有權拒絕賠償。不過若果車主事前根本唔知所去地方有危險，或者在往返安全地方途中遇上惡劣天氣而發生事故，又或者本來已經泊低架車在安全地方，點知架車因為落大雨浸０左，甚至俾水沖走撞壞０左，損毀完全出於車主可以控制或者意料的範圍之外，保險公司係會負責賠償的。

而職業司機若果非開工不可，就應該查下架車的保單有無講明於暴雨警告及八號風球下行車無得保，又或者事先與保險公司講明需要在惡劣天氣下行車，得到保險公司同意，擴大保單的保障範圍，就算在天氣惡劣的情況下行車都有保險喇。（資料來源：香港保險業聯會）

（本欄歡迎讀者來信或電郵討論有關汽車保險及索償之問題。由於法例時有修改，本信箱內容僅供參考，並不代表法律意見。）